|
2012渣馬報告
今朝因遲咗出門口, 同靜儀跑咗成大半k去港鐵站, 好彩仲趕到班車, 就當提早熱身!
與TKO大隊會合後, 一同出發到尖沙咀, 大家沿途起車廂內有講有笑, 場面非常熱鬧, 自己的心情亦開始興奮!
到達後由Rockie帶領到熱身地點, 發覺好正, 好似私家熱身區咁, 淨係得我地. 去厠所同寄行李都好方便, 下年一定要去番果度.
大隊6:15先上線, 但仍能霸到好前位置, 所以起步時一d都冇塞人, 順利照計劃好之pacing(約4:50-4:55/k)向前跑. 本來話跟我一齊跑的昌哥, 唔夠兩k就賣甩左我, 之後再冇見佢尾燈! 好彩仲有車仔陪住我, 後來見到R同SUE起前面, 於是鈎住佢地走, 果然走得好順, 一路搭住R架車上青馬, 途中仲遇到BATBAT同KF, BATBAT好快就介左我地. 入左青馬之後越走越順, R車仔KF都比我介埋, 個心好雄越跑越快, 就係咁中咗招, 一對小腿26K開始作抽, 好彩仲記得Rockie教既對抗抽筋大法, 步幅收窄但加密, 隻腳落地時膝頭微彎, 用咗此方法後發覺果然有效, pacing只係跌咗少少. 加上分段食咗三包gel同八粒鹽丸, 終救得番, 後半程只有作抽而冇真正抽, 最後4k仲完全冇作抽!!! 未入長青隧道已被R介番, 途中見到本來起我前面既Stephen突然起我後面出現, 嚇咗我一跳, 原來佢做咗officer, 中途疴咗三次(聽講佢後來再疴咗三次). 捱到西隧入口時再, 開始覺得爆爆地, 好在有Terence佢地起路邊同我打氣, 個人好似比佢地叫番醒咁, 於是直衝入西隧, 仲起裏面介番R. 到咗西隧出口條長命斜, 諗住有排捱, 點知好順咁上晒, 一D都唔辛苦. 跑下跑下, 終於落橋喇, 最後4K咬緊牙根捱埋佢, 去到灣仔碼頭見番BATBAT, 跟住R又殺番上黎, 三個人一齊掟落銅鑼灣, 去到SOGO後面離遠見到靜儀, 於是即刻執靚個樣對住鏡頭揮手微笑, 但睇下個錶原來已經用咗3:26, 好驚SUB唔到3:30, 於是搏埋條老命衝埋佢, 最後同R及BATBAT互介住入維園, 但最終都係比佢地介低咗, 離遠見到個鐘既時間係3:28:XX, 於是用埋最後果一口氣狂奔向終點, 最後睇下自己隻錶既時間係3:28:40, 開心到幾乎暈低咁滯, 冇多冇少, 就係達到目標3:28!!!!!!
10K : 49:XX
21K : 1:42:XX
30K : 2:27:XX
42.8K : 3:28:40
(多謝Rockie既教路同埋果d1.9 x N 既tempo訓練, 好有用!) |
|