|
|
2010年ITU三項鐵人亞洲盃
今日參加左ITU三項鐵人奧距的比賽!! 今年已經是第二次參加. 由於上星期六去左台東參加半鐵人的比賽, 事前都心大心細應否報這個比賽, 但畢竟這比賽是香港三鐵的最大型賽事, 今次就抱住只求參與的心態去玩. 但上星期條鮎魚响度搞搞震, 搞到個賽後BUFFET取消左, 個比賽又唔知會唔會又取消埋. 星期日早上亦相應安排了其他節目, 所有比賽的心情完全消失無影無踪. 但忽然條鮎魚又變左條病魚游走左, 個賽事又有得玩番, 只是游水轉項要多跑900m去轉項區, 好過冇.
晨早5時左右, 已相約馬王兄及loud兄一起由上水出發. 順風順水約6時半去到廸士尼, 之後set好地盤, 做好body marking就去聽briefing. 行梗去的時間, 見海面的浪只屬一般, 但見到好多人都游得偏離航道, 應該都有幾勁的暗湧. 由於路程都幾遙遠, 所以去到時已briefing完. 說時遲, 那時快已開始落水, 自己就連筋都未拉, 身又未熱的情況下就落水. 好彩平日早上都習慣唔熱身就落水, 游一陣當熱身來減省時間. 差不多最後一個落水, 當游到去平時等出發的大外檔, 毫無心理準備下, 突然聽到”boo”一聲, 賽事開始, 於是拿拿臨按錶出發. 由於在大外檔的關係, 都冇太多人踼來踢去. 不過由於知道有暗湧, 所以唔敢偷懶, 幾下水就望上水, 避免游歪. 一路游, 一路偷番入中間位置, 所以同旁邊的鬼佬偶有碰撞, 不經不覺就去到浮波處, 回程時發覺好順, 可能有湧流推住的關係, 真係好舒服, 第一圈只用了15:11. 之後第二圈去程就感到有阻力. 好耐都未見浮波, 最後游了32:xx分鐘上水. 上水見到d鬼佬冇著鞋就跑番去, 自己就著極都著唔到對鞋, 感覺蝕晒d時間, 但跑梗時覺得有d力, 又發覺冇著鞋的選手跑得慢d, 可能腳痛卦, 所以又慶幸自己著左鞋, 到轉項區搞轉項, 立到自己用了6分半到自己地盤+做梗轉項,. 由於仲未識車上著鞋, 都係要抽住對鞋推車去上車區, 有d瘀….出車時見總轉項時間為8 分幾鐘左右. 到踩車部份, 上車一踩就知道自己未recover晒. 對大腿立即好鬼酸. 咁樣唔係辦法, 一定捱唔住. 於是諗住搵d同速車黎勾下, 但好多都是快車, 想勾都勾唔到. 去到翔東路, 見到有d上個heat的鬼佬差不多速度, 於是泊埋去勾車, 雖然唔算好快, 只34-35km/hr左右, 但省下力都好呀. 個鬼佬好似知道我勾車, 過一陣佢慢左落黎, 於是我就推上前帶車. 之後佢又上黎, 互帶一陣. 不過回程時, 啱啱前面有位螢光小姐踩住MTB, 剛好又有班車沖梗上黎, 唔敢抽出去, 自己就要收晒brake, 費事隊到前面個螢光小姐. 但可以抽頭出去時, 個鬼佬已經去左. 唯有自己頂. 不過可能肥的關係, 感覺自己上斜好慢, 好辛苦. 不過好彩好快就踩完40km. 臨回轉項區, 在公園內諗住除定鞋, 點知個大肚腩作抽筋, 於是放棄了. 好辛苦才推車回到轉項區. 之後開始跑最後10km, 此時已用了2:00:xx. 可能仲可以sub 3hr. 在跑草地時發覺d泥”瀉”晒d力, 跑得好鬼辛苦, 去到身海濱長廊, 發覺已有人開始慢jog, 但經上次半鐵冇帶帽跑, 比太陽晒到爆的經驗, 今次有你冇你幾大帶番頂太陽帽頂頂, 果然有效. 雖然晒, 但額頭冇晒住就跑得舒服好多. 好快就第一次去到B拆返點, 比想像中短. 加上界到人的興奮,對腳好似輕鬆番D. 但之後一入草地, 吸星大法又再開始. 之後就一路跑就以榮兄同潺鐵兄來做pacing, 唔好比自己”LUCK”, 又唔好比自己謝. 到第三圈時, 發覺四頭肌作抽, 好想行, 但博命同自己講, “一行就唔再跑唔番, sub3就無望, 自己之前半鐵都捱到啦!! 仲有唔夠5km之麻. 谷埋去啦!!” 之後又真係慢慢ok番喎. 到第四圈, 過左榮兄, 之後轉入D點去終點, 去到終點前500m, 立到後而有師兄追梗上黎, 唔想被界, 於是出力跑, 發覺原來係Frankie兄, 佢建議一齊跑過終點. 於是一起拔足狂奔, 一齊過終點. 總時間為2:53:xx. 好開心可以SUB3HR. 但總成績比去年慢接近3分鐘.
就賴半鐵未RECOVER啦!! 大會公布的成績如下:
時間
游泳 00:32:17
轉項1 00:08:36
單車 01:16:30
轉項2 00:03:55
跑步 00:52:53
總時間 02:54:09
又開始要練渣馬lu!!!
|
|
發表於 2010-10-19 18:10:23
樓主
發表於 2010-10-21 21:26:02
唯有繼續跑多個圈番屋企. 慢跑左7KM咁大把. 
" />" />hj